RSS
Container Icon

A friends mind diary



You were my very first love,
A tale then untold and so naïve,
Till read to someone who crave
To offer a life-knot now I have..

I wanted to be very much true
To my would-be life with no rue
But, I found you in awesome glue
I had no clue and felt blue!

Reserved that piece of love,
Flew away with my new dove,
Years went by only to see it pave,
Time with memories that you gave!

Shared the thoughts when we met,
It was not a joke for you, I bet.
Fights were on for what we lost,
Blames aired on who then be first,

Blushed at times, such time was set,
Brushed the mind filled with mist,
Still, we know with ease we must,
Cherish all bliss we have, the most!

  • Digg
  • Del.icio.us
  • StumbleUpon
  • Reddit
  • RSS

കാലങ്ങളില്‍... ഞാന്‍


എന്‍റെ ഇന്നലെകളില്‍ 
ഇഷ്ടപ്പെടാത്ത ഒരു പാട് നാളെകള്‍ ഉണ്ട്.. 
ഒരു മാര്‍ച്ചില്‍
വേനലവധിക്ക് മുന്‍പുള്ള 
അവസാനത്തെ പകലില്‍ നിന്നിലേക്ക്‌നടക്കവേ
ഞാന്‍ ബാക്കി വച്ച 'നാളെ'യില്‍ തുടങ്ങി
എന്‍റെ ചില്ല്ജാലകത്തില്‍ മഞ്ഞു തുള്ളികളാല്‍ നീ എഴുതി
പൂര്‍ണ്ണമാക്കാതെ വച്ച 'നാളെ'വരെ...
അങ്ങനെ, ഓര്‍ത്തെടുക്കുമ്പോള്‍
നേരാവുന്ന ഒരു 'നാളെ' ഇല്ല തന്നെ...

സമയത്തെ നീ
തള്ളവിരലിന്‍റെ തുമ്പില്‍ വച്ച്
ചൂണ്ടു വിരല്‍ കൊണ്ട് തെറിപ്പിച്ചു കളയുന്നത് കണ്ട്
ഞാന്‍ മിഴിച്ചു നിന്നിട്ടുണ്ട്..
അന്ന് അത് എന്നെയും കൂടെ പഠിപ്പിച്ചിരുന്നെങ്കില്‍ ...
ഘടികാരസൂചികള്‍ കൊണ്ട് മുറിവേറ്റ എന്‍റെ വിരലുകള്‍
ചുവന്ന നിറത്തില്‍ കരയുകയില്ലായിരുന്നു
കാലങ്ങളെ അറിയാത്ത മറവിയുടെ കടലിലേക്ക്‌ അത്
ഒഴുകിപ്പോകുമായിരുന്നുമില്ല....
അനന്തമായ ചങ്ങലകളാല്‍
നീയെന്നെ ജീവനില്‍ ബന്ധിച്ചിരിക്കുമ്പോള്‍
ഓടിയൊളിക്കുവതെവിടേക്ക്?

നാളെ..
മികവുറ്റ മിഴിവാര്‍ന്ന ഒരു സുന്ദരസ്വപ്നമാണ്.
ആകാശത്തിന്‍റെ അനന്തനീലിമയില്‍
ചെന്തീത്തളിക തൂവിയ വര്‍ണ്ണങ്ങള്‍
മേഘചിത്രങ്ങള്‍ തീര്‍ക്കുന്നത് കാണാന്‍..
നിറവോ ഒഴിവോ തിരഞ്ഞെടുക്കാന്‍,
മേഘങ്ങളെയോ സൂര്യനെയോ വരിക്കാന്‍,
ഒടുവില്‍.. ഇന്നിന്‍റെ ആത്മാവ്
ഒരു നീലവെളിച്ചമായ് മറയുന്നത് കാണാന്‍
നീയുമുണ്ടാവില്ലേ എന്‍റെ കൂടെ?

നിയതി ഒരു നുണയനാണ്
എന്‍റെ പ്രതീക്ഷകളുടെ ചീട്ടുകൊട്ടാരത്തില്‍
താഴത്തെ നിലയില്‍ നിന്നും ചിരിക്കുന്ന രാജകുമാരനെ
വലിച്ചെടുക്കുന്ന പെരും നുണയന്‍..
അതറിഞ്ഞും.. ഇന്നലെകളിലേക്ക്
വാഗ്ദാനങ്ങള്‍ അടുക്കി വച്ച്
ഞാന്‍ അത് പണിതു കൊണ്ടേയിരിക്കുന്നു...

  • Digg
  • Del.icio.us
  • StumbleUpon
  • Reddit
  • RSS

പ്രണയഖനികള്‍



മധുരമീ ലാസ്യമര്‍ദ്ദത്തിന്‍റെ ഇരയാണ് ഞാന്‍..
മറയാന്‍ മടിച്ചു നില്‍ക്കുന്ന നിന്റെ നിഴലിനു
മുന്‍പില്‍ കരുണയിരന്നു ഞാന്‍.. 
നിന്‍റെ ആ പഴയ കൊട്ടാരച്ചുവരുകളില്‍ 
നീലഞരമ്പുകള്‍ പോലെ പടര്‍ന്ന വള്ളികളില്‍ 
നിറയെ പൂത്തു നിന്ന ഊതവര്‍ണ്ണത്തിലുള്ള പൂക്കള്‍ 
നിത്യസുഗന്ധമായ് വളരുന്നുണ്ട്‌ എന്റെയുള്ളിലും.. 
കരി പൂശിയ ഈ കാഴ്ചമണ്ഡലത്തിലൂടെ
കാണാതെയെനിക്ക് നിന്‍റെ മുഖം വരച്ചെടുക്കാം.. 
മാന്ത്രികനൊരുവന്‍റെ കരവിരുതോടെ 
മെഴുകില്‍ നീ തീര്‍ത്ത പാവക്കുട്ടിക്ക് 
പ്രാണന്‍ സന്നിവേശിപ്പിച്ച ഈ രണ്ടു നീല രത്നങ്ങള്‍
പ്രണയമിഴികള്‍ക്ക് പകരം വയ്ക്കാം..
ആ നീലമിഴികളിലൂടെ എനിക്ക് 
ആരുമറിയാതെ നിന്നിലേക്ക്‌ നോക്കാം.. 
നിശ്വാസങ്ങളെ നിശ്ചലമാക്കി 
നിതാന്തമായ് അലിയാം.. 
എങ്കിലും.. നിന്‍റെയീ മൗനം പൊറുക്കപ്പെടില്ല..
എന്താണിത്?? മായയോ?
എനിക്ക് ശ്വസിക്കുവാന്‍ കഴിയുന്നില്ല.. 
ഏകാന്തത ഒഴുകിയിറങ്ങി തണുത്തുറയുമ്പോള്‍ 
എനിക്ക് മഞ്ഞുപാളികള്‍ ചിതറുന്നത്‌ പോലെ കരയാം 
എന്ന് നീ പറഞ്ഞത് ഞാനോര്‍ക്കുന്നു.. 
ഒരിക്കല്‍ ഞാന്‍ ഇതില്‍ നിന്ന് മുക്തി നേടും.. 
ഒരിക്കലുമുണരാത്ത മധുരതരമായ
ഒരുറക്കത്തിന്റെ സാന്ത്വനത്തില്‍;
ഒടുവില്‍ നമ്മുടെ പ്രണയം പുനര്‍ജ്ജനിക്കും വരെ ..
വാശിയോടെ കത്തിയെരിയുന്ന സൂര്യന്‍ 
വീണ്ടും ശൂന്യശയ്യയിലേക്ക് നോക്കി പൊട്ടിച്ചിരിക്കും 
ആ നീല രത്നങ്ങള്‍ രാത്രികളില്‍ വീണ്ടും തിളങ്ങും.. 
ആരും ചെത്തി മിനുക്കാത്ത ഒരു രത്നമാണ് ഞാനെന്നു നീ പറയും.. 
അന്ന് ഖനികളിലേക്ക് നിന്നെ ഞാന്‍ കൊണ്ട് പോകും... 

  • Digg
  • Del.icio.us
  • StumbleUpon
  • Reddit
  • RSS

മറവി മറന്നുവച്ച നീലക്കണ്ണുകള്‍



ഒടുവില്‍ ഹിമാംശു,
വിലാസവതിയായ നിശയ്ക്ക് 
പൂര്‍ണ്ണമായും കീഴടങ്ങിയിരിക്കുന്നു.. 
താരകങ്ങള്‍, തടഞ്ഞു നിര്‍ത്തിയ സുഖദനിദ്രയെ 
ആലസ്യമിഴികളാല്‍ കടാക്ഷിക്കുന്നു.. 
അഭൂതവേദനം നിന്നോര്‍മ്മകള്‍..
ഏതു നിരാശകുന്ധത്തില്‍ നിന്നുമുയിര്‍പ്പിക്കാന്‍ പോന്നത്!
കനത്ത കരങ്ങളാല്‍ കമ്പിളി പുതപ്പിച്ചു നീ 
കാതിലോതിയത്, ചുവടു തെറ്റാതെ പട വെട്ടി 
തോല്‍ക്കാനരുതാതെ തളര്‍ന്നു വീണിരുവരും ജയിച്ച, 
യുദ്ധങ്ങളുടെ കഥകള്‍.. 
കണ്ഠത്തില്‍ നിന്നുമുയരുന്ന 
രാഗത്തിന്റെ ആരോഹണാവഹരോഹണങ്ങള്‍ക്ക്, 
പിന്‍കഴുത്തില്‍ പതിയെയുരസ്സുന്ന താടിയെല്ലിന്‍റെ ചലനങ്ങള്‍ക്ക്, 
കടലിളക്കാന്‍ പോന്ന കൊടുങ്കാറ്റിന്റെ താളമായിരുന്നു.
ഇനി അരുണോദയകിരണങ്ങള്‍ 
അതിലോലം ഒരപ്സരസ്സിന്നഴകാര്‍ന്നു 
ഈ വാതായനങ്ങളിലൂടൊഴുകിയിറങ്ങിത്തുടങ്ങും...
പിന്നെ പതിവ് തന്ത്രങ്ങളുമായ് 
അവള്‍ ഈ ഇമ്പതല്‍പ്പത്തിലേക്കിഴഞ്ഞു കയറും.. 
കണ്ണടയ്ക്കാനും കരളുറങ്ങാനും മറന്നു തുടങ്ങവേ 
അധരങ്ങളില്‍ നിന്നും അവധിയെടുത്ത് പോകുന്ന 
ഓരോ ചുടുനിശ്വാസത്തിലും 
എന്റെ മുറിയിലെ അന്ധകാരത്തിന്‍റെ അതിര്‍വരമ്പുകള്‍ 
ഒന്നൊന്നായി മുറിച്ചെറിയപ്പെടും.. 
പക്ഷെ, നീ ഒരിക്കലും അറിയുകയില്ലല്ലോ 
ആ നീലക്കണ്ണുകളെ,
ഞാനെവിടെയാണ് മറച്ചു വച്ചതെന്ന്...

  • Digg
  • Del.icio.us
  • StumbleUpon
  • Reddit
  • RSS

എന്‍റെ നിഴല്‍



എനിക്കുമുണ്ടൊരു നിഴല്‍ 
എന്റെ ചെയ്തികളെല്ലാമനുകരിക്കും 
എനിക്ക് സദൃശ്യയായൊരുവള്‍
എല്ലാ പുലരികളിലും 
എന്നുമെന്‍ സന്ധ്യയിലും 
എന്നിലും കിളരം പൂണ്ടു നടപ്പവള്‍ 

ഉച്ചനേരം ഉഷ്ണമുച്ചിയിലിറങ്ങവേ
ഉണ്ടാകുമൊരു കൊച്ചുകുഞ്ഞിനെപ്പോലവള്‍
അതിശയമുണ്ടിതെന്തു നിന്നിരുണ്ടമേനി
അമിതമായ് ഭയക്കുവതെന്ത് വെളിച്ചത്തെ

കുറുമ്പോടെ കറങ്ങി നടന്നീടുമെങ്കിലും
കാല്‍കളില്‍ നിന്നും പിടി വിടാറില്ലവള്‍
മറക്കാതെയെന്നുമൊരുമാത്രമുന്‍പേയെന്‍
മെത്തമേലേറി കിടക്കാറുമുണ്ടവള്‍.... 

  • Digg
  • Del.icio.us
  • StumbleUpon
  • Reddit
  • RSS

വായിക്കപ്പെടാത്തത്...



അക്ഷരങ്ങള്‍ എനിക്കായ് 
ഒരു നഷ്ടവും പേറുന്നില്ല. 
ഹൃദയത്തില്‍ കോറിയ, 
പൊള്ളിയടരുന്ന, 
നാമധേയങ്ങള്‍ ഒന്നുമില്ല ... 
ഇന്നിന് വിരഹമില്ല 
ഈ നിമിഷങ്ങളില്‍ 
എനിക്കുമാ 
മിഴികള്‍ക്കുമിടയില്‍
വെറുതെ വിങ്ങും, 
മൗനം തീര്‍ക്കുമൊരു 
മാത്രനൊമ്പരം മാത്രം..... 
മറുനിമിഷം എന്റേതെന്നു 
വിരലുകള്‍ വരച്ചിടുന്ന 
വിലോല വിസ്മയം, 
വേഗമിഴയുന്ന സമയത്തില്‍ 
വേറിടാത്ത സ്പന്ദനങ്ങള്‍ 
കേള്‍വിക്കുമപ്പുറം
നിറയുന്ന സംഗീതം, 
തുടര്‍തെന്നലായ് 
തഴുകുന്ന ജീവിതം !! 
അതെ, ഇരു ഹൃദയങ്ങള്‍ 
പങ്കുവയ്ക്കുന്നത്‌ ഇതാണ്.... 


  • Digg
  • Del.icio.us
  • StumbleUpon
  • Reddit
  • RSS

മഴ നനഞ്ഞ മലര്‍




സാമീപ്യം കൊണ്ട് ഉച്ഛസ്ഥായിയിലാവുന്ന 
സ്പന്ദനങ്ങളുടെ താളക്കൊഴുപ്പില്‍ 
ഹൃദയങ്ങള്‍ നൃത്തമാടുന്നതും 
സ്നേഹത്തിന്‍റെ പ്രകാശവേഗങ്ങളില്‍
മിഴികള്‍ അന്ധമാകുന്നതും 
അവര്‍ക്കിടയില്‍ ഒരത്ഭുതമായിരുന്നില്ല.. 
സമാനതകളില്ലാത്ത 
സമര്‍പ്പണം മാത്രം മതിയായിരുന്നു 
എല്ലാ ആശങ്കകളെയും ദൂരീകരിക്കാന്‍.. 
അപ്പോള്‍ 
പ്രണയത്തിന്‍റെ മാലാഖമാര്‍ 
മനസ്സിന്‍റെ മണിയറവാതില്‍ മലര്‍ക്കെ തുറന്നു 
അനുഭൂതിയുടെ അനന്തവിഹായസ്സിലേക്ക്‌ 
അവരെ കൈ പിടിച്ച് കൂട്ടിക്കൊണ്ടു പോകും..    
അവിടെ അവന്‍ മഴയും അവള്‍ മലരുമാവും..
കണ്ണുകള്‍ കൊണ്ട് പ്രണയിക്കാനും 
മനസ്സ് കൊണ്ട് മന്ദഹസിക്കുവാനും 
അവര്‍ പ്രതിജ്ഞയെടുക്കും.. 
ആത്മാവുകള്‍ ആവാഹിച്ച 
ഒരു ചൊരിമണല്‍ ഘടികാരത്തിനുള്ളില്‍  
അവര്‍ അവരുടെ നാഴികകളെ മറന്ന് വെക്കും.. 
സ്നേഹത്തിന്‍റെ അര്‍ത്ഥം പൂര്‍ണ്ണമാകും.. 

  • Digg
  • Del.icio.us
  • StumbleUpon
  • Reddit
  • RSS

വെറുമൊരു സ്വപ്നജീവി




"നിന്‍റെ യുദ്ധമല്ലിത്" എന്ന് 
ഉള്ളിലിരുന്നു ആരോ പറയുന്നുണ്ട്..
ആവര്‍ത്തനങ്ങളുടെ അഗാധതകളില്‍ നിന്ന് 
ഉപരിതലത്തിന്‍റെ അപാരതയില്‍ വന്നു 
കുറച്ചു ശുദ്ധവായു ശ്വസിക്കുന്നത് പോലെയാണ്
ചില ഓര്‍മ്മപ്പെടുത്തലുകള്‍.. 
കണ്‍‌തുറന്നു നോക്കുമ്പോള്‍
ആകാശത്തിന്‍റെ ഏതു കോണിലേക്കാണ്
പറക്കേണ്ടത് എന്ന് തീരുമാനിക്കും..
എനിക്ക് ചിറകുകള്‍ ഇല്ലെന്നും
ഞാന്‍ ഒരു കുഞ്ഞു മത്സ്യമാണെന്നും
അപ്പോള്‍ ഞാന്‍ മറക്കും...

  • Digg
  • Del.icio.us
  • StumbleUpon
  • Reddit
  • RSS

ഞാന്‍ =നീ ?



പിണക്കം..
തൊടിയിലെ കരിയിലക്കലപിലകളില്‍ ഞാന്‍ 
തിരഞ്ഞും കേള്‍ക്കാതെ പോകുന്ന എന്‍റെ പേര്..

മൌനം..
എന്നോ നിന്‍റെ സ്വപ്നങ്ങളിലേക്ക് എത്തി നോക്കി 
എന്നെ കണ്ട എന്നില്‍ നഷ്ടമായ മൊഴികള്‍..

വേദന..
വിരല്‍ത്തുമ്പുകള്‍ കോറിയ ഒരു വിരസചിത്രത്തില്‍
വിരഹം മനസ്സിലവശേഷിപ്പിച്ച ഒരു ചുവന്ന വര..

കാലം..
എനിക്കും നിനക്കും മനസ്സിലാവാത്ത അളവുകോലുകള്‍
എന്തിനെന്നറിയാതെ തിട്ടപ്പെടുത്തുന്ന നാളുകള്‍..

ഞാന്‍..
ഇഷ്ടമാണെന്നും അല്ലെന്നും ചൊല്ലി നീ അടര്‍ത്തിയ
ഇതളുകള്‍ക്കൊടുവില്‍ ബാക്കിയായ ഒറ്റയിതള്‍..
നീ..
കൈ നിറയെ പൂത്ത പ്രണയപ്പൂവാകയുടെ നിഴലില്‍
കാറ്റെടുത്ത ഒരു പൂവിനെ കാത്തു നില്‍ക്കുന്നവന്‍..

ഞാന്‍..
ഇരുളിന്‍റെ മറവില്‍ പുഴയിലേക്ക് അലിയാന്‍
ഇന്ദ്രിയങ്ങളെയൊരുക്കി എന്നും കാത്തിരുന്നവള്‍..
നീ..
ഒരു ചേമ്പിലക്കുമ്പിളില്‍ പ്രിയമോടെ തടഞ്ഞു നിര്‍ത്തി
ഒരു വെയില്‍നാളത്താല്‍ എന്നില്‍ തിളക്കം നിറച്ചവന്‍..

ഞാന്‍..
ഒടുവിലെ മെഴുകുതിരിയില്‍ നിന്നുരുകിയ തുള്ളികളില്‍
ഒരിറ്റു മിഴിനീര്‍ കലര്‍ത്തി നിന്നെ കുളിര്‍പ്പിച്ചവള്‍..
നീ..
പതറാത്ത ചുവടുകള്‍ വച്ചു എന്നെ നെഞ്ചോടു ചേര്‍ത്തു
പതിയെ പുലരിവെളിച്ചത്തിലേക്ക് നടന്നു കയറിയവന്‍..

ഞാനും നീയും..
പരശ്ശതം ബിംബങ്ങളില്‍ കാലാതീതം പ്രേമത്തിന്‍റെ
പരസ്പര പൂരകങ്ങള്‍ ആയി നിലകൊള്ളേണ്ടവര്‍ 

  • Digg
  • Del.icio.us
  • StumbleUpon
  • Reddit
  • RSS

“ഇത് എന്‍റെ മഴ – നിനക്കായ്”





ഓരോ മഴയും  നിന്‍റെ ഓര്‍മ്മപ്പെടുത്തലുകളാണ്
ആ ഓര്‍മ്മകളില്‍ ഒരായിരം കിളിനോവുകളില്‍ 

അനസ്യൂതം എന്നെ ആഗിരണം ചെയ്യുന്ന 
ഈ മഴത്തുള്ളികളില്‍... 
ഇടയ്ക്കിടെ, നനഞ്ഞൊട്ടിയ ചിറകുകളില്‍
പ്രിയമുള്ള ഒരു കൊക്കുരുമ്മുന്ന സുഖം!!
എനിക്ക് ചുറ്റും കനത്ത
നിശ്ശൂന്യ നിശബ്ദത
നീ കൊണ്ട് വന്നത്
നിനക്കായ് പൊഴിച്ചെങ്ങോ നഷ്ടമായെന്നു
ഞാന്‍ കരുതിയൊരു വര്‍ണ്ണത്തൂവല്‍!!
അറിയാമെനിക്കു...
നിനക്ക് കൂട്ടിനു കന്യയാം മരുഭൂമിയും
പതിതയാം കടലും തപ്തനിശ്വാസങ്ങളും ഉണ്ടെന്ന്..
മുറിയാത്ത മഴനൂലുകളില്‍ 
ഞാന്‍ കൊരുത്ത് അയച്ചോരീറന്‍ കൊഞ്ചലുകള്‍
നിന്‍റെ മാനം കുലുക്കി മനസ്സുലച്ച്
പെയ്യട്ടെ വിരഹമഴയായ്!!
ആ മഴയില്‍, ഇലഭാരത്തില്‍ 
കുനിഞ്ഞ് പോയൊരു ചില്ലയുടെ തുമ്പത്തെ
ഇത്തിരിപ്പൂവിന്റെ നെഞ്ചില്‍
കരുതി വയ്ക്കാം നിനക്കായ്
എന്റെ മഴ..
പ്രണയം ചിതറുന്ന തൂലികത്തുള്ളികളില്‍
നിന്‍ മിഴിയൊളി തെളിയിക്കുന്ന ഓര്‍മ്മവില്ല്!!
ഊഷരതയിലും വസന്തം വിരിയിക്കുന്ന
നിന്‍റെ മായാജാലം.. 
അതിനു വേണ്ടിയാണ് ഞാന്‍ കാത്തിരിക്കുന്നത്
പ്രാണന്‍ കൊളുത്തുന്ന വേദനയിലാണ്
നിന്‍റെ വാക്കുകള്‍ അപൂര്‍ണ്ണമാകുന്നതും
എന്നിലേതോ ആഴങ്ങളിലേക്ക്
ഒരു അശ്രവ്യ മുഴക്കമായ്
അതലിഞ്ഞു പോകുന്നതും!!

  • Digg
  • Del.icio.us
  • StumbleUpon
  • Reddit
  • RSS

ആര് നീ ?



എന്‍റെ മനക്കോട്ടകള്‍ കീഴടക്കി 
ഹൃദയവഴികളില്‍ കാവല്‍ നില്‍ക്കുന്ന നീ!
പക്ഷെ എന്‍റെ നിശ്ശബ്ദ സ്വപ്നങ്ങളുടെ 
ലഹരിയാല്‍ ഉന്മത്തനാണ്.
അവ്യക്തമായ നിന്‍റെ കാഴ്ചയില്‍ 
അല്‍പനേരം ഞാനുമൊരുല്‍കൃഷ്‌ടസൃഷ്ടി! 
പകലുകളില്‍ കേട്ട കളകൂജനങ്ങള്‍, 
ഉറങ്ങാതിരിക്കുന്ന ഒരു രാപ്പാടി,
ഒന്നും 
ഈ ഇരുട്ടിന്‍റെ തിരക്കില്‍ 
എനിക്ക് കൂട്ട് വരുന്നില്ല... 
വെളിച്ചമെല്ലാം പൊലിഞ്ഞ 
ഈ ഏകാന്തയാത്രയില്‍ 
എനിക്ക് കൂട്ടായുള്ളത് 
ഈ ഭയത്തിന്‍റെ പാദചക്രങ്ങള്‍ മാത്രമോ! 
നിരാസത്തിന്‍റെ കരിനാഗങ്ങള്‍ 
കാലങ്ങള്‍ക്കപ്പുറത്തു നിന്നും 
പുറപ്പെടുവിക്കുന്ന 
സീല്‍ക്കാരം ഞാന്‍ കേള്‍ക്കുന്നുണ്ട് 
വരുന്ന ജന്മങ്ങളിലും 
എന്നെ നിഗ്രഹിക്കുവാന്‍ പോന്നത്ര 
വിഷം ഉണ്ട് ആ ദംശനങ്ങളില്‍..
എന്‍റെ ഇടതു കാല്‍മുട്ടിന് മുകളിലായ് 
ഞാന്‍ ഒരു കൈലേസ് ഇറുക്കി  കെട്ടട്ടെ, 
നീ സമ്മാനിച്ച ചിത്രത്തുന്നലുകളുള്ള 
വെളുത്ത നിറമുള്ള ആ തുണിക്കഷ്ണം.. 
കരിനീല നിറമാര്‍ന്ന ദേഹത്ത് 
അത് ഒരു ശുഭ്രവഞ്ചനമുദ്ര..

  • Digg
  • Del.icio.us
  • StumbleUpon
  • Reddit
  • RSS

എനിക്കുമുണ്ടൊരു പേര്


നനുത്ത പ്രഭാതങ്ങള്‍ വിരുന്നെത്തും വരെ 
നിന്‍റെ വാക്കുകളുടെ കുളിര്‍മ്മയില്‍, 
നനഞ്ഞുറങ്ങുന്ന എന്‍റെ പുതിയ പേരുകള്‍
കവര്‍ന്നെടുക്കാന്‍ മാത്രമായ് 
കര കവിഞ്ഞതാണീ പുഴകള്‍..


നിന്‍റെ അസ്ഥിരചിന്തകളാല്‍
നിത്യവുമെന്നെ പ്രിയങ്കരിയാക്കി
നിന്‍റെ കലഹരേണുക്കള്‍
സ്നേഹമാപിനിയില്‍ തൂകി
നിറഞ്ഞ ചിരിയോടെ നീ ..

നിന്‍റെ സ്നേഹത്തിന്‍റെ മഞ്ഞുമലയ്ക്കുള്ളില്‍
ശിലാദ്രവ്യമായ് ഉറഞ്ഞു കിടക്കുന്നുണ്ടാവാം
എന്‍റെ ആദ്യത്തെ പേര്..
അലറുന്ന മലവെള്ളപ്പാച്ചിലിലും
അടിത്തട്ടില്‍ ഒഴുകാതെ കിടക്കുന്ന നക്ഷത്രം പോലെ..

തൂവലുകളുടെ മിടിപ്പുകളെ
ഭാരമില്ലാതെ ബലപ്പെടുത്താനും
ഏറെ പറയും മുമ്പേ, നിശബ്ദമാക്കാനും
നിലാവിനെ പകുത്തൊരു കനവ്‌
എല്ലാ നീലരാത്രികളിലും എത്തുന്നുണ്ട്..

മധുചഷകങ്ങള്‍ ഒഴിയും വരെ
ഞാന്‍ ഒരു സ്ഥിരം ക്ഷണിതാവ്....
പോറലുകള്‍ വീഴുകില്ലെങ്കിലും
സ്ഫടികപ്പാത്രങ്ങള്‍ ഉടഞ്ഞു പോകാറുണ്ട്;
ചിലപ്പോഴൊക്കെ..
ഭാവിയിലേക്ക് ചിതറിപ്പോവുന്ന ചിരികള്‍ പോലെ

  • Digg
  • Del.icio.us
  • StumbleUpon
  • Reddit
  • RSS

മനപ്പെയ്ത്ത്



ഒന്നു നനയാന്‍ കൊതിച്ച ഓര്‍മ്മകള്‍ 
ആകാശത്തു ഇടിമുഴക്കം തീര്‍ക്കുമ്പോഴും 
ഞാന്‍ ഉറങ്ങുക തന്നെയായിരുന്നു.. 
പക്ഷെ ചിതറിത്തെറിച്ച ഒരു മഴത്തുള്ളി 
ഭൂമിയെ തൊട്ടതിന്‍ മുഴക്കമെന്നെ ഉണര്‍ത്തി... 
വിരഹത്തിന്‍റെ മിന്നല്‍ വെളിച്ചമകറ്റാന്‍  
ഇറുകെ അടച്ച കണ്ണുകളെ   
ഒരു കുഞ്ഞു മിന്നാമിനുങ്ങിന്‍റെ 
ഇത്തിരി വെട്ടം മഞ്ഞളിപ്പിച്ചു
മഴയുടെ നിലയ്ക്കാത്ത താളങ്ങള്‍ 
എന്‍റെ കാതുകളെ ആര്‍ദ്രമാക്കുന്നു 
നിര്‍വ്വചിക്കാന്‍ കഴിയാത്ത ആ താളത്തില്‍  
നിറഞ്ഞു പെയ്യുന്ന വേനല്‍ മഴയുടെ കരുത്തില്‍,
ചൂടിന്‍റെ കണികകള്‍ പൊട്ടിപ്പടരുമ്പോള്‍
ഉയരുന്നു മണ്ണിന്റെ മണം;
ഒരു സ്നേഹപരിരംഭണത്തിനായ് 
നെഞ്ചു തുടിച്ചു ഞാന്‍ എഴുന്നേല്‍ക്കുകയാണ്.. 
മഴ കനത്തു തുടങ്ങിയിരിക്കുന്നു.. 
കുളിരോര്‍മ്മകളില്‍ ഒരു തലയിണയുടെ പതുപതുപ്പിനു മേല്‍ 
നിന്‍റെ തിളങ്ങുന്ന കണ്ണുകള്‍ ഉണര്‍ന്നു തന്നെ നില്‍ക്കുന്നു... 
എന്‍റെ സ്നേഹമന്ത്രണങ്ങള്‍ വരികള്‍ തീര്‍ത്ത 
മഴനൂലുകള്‍ താളമിട്ട ഒരു പ്രിയരാഗം ഞാന്‍ മൂളാം.. . 
കാതോര്‍ത്താല്‍ നിനക്കതു കേള്‍ക്കാം.. 
ഈ മനപ്പെയ്ത്തു തുടരട്ടെ.. ഒടുവില്‍, 
തണുത്തു തണുത്തു ഞാനൊരു മഴത്തുള്ളിയായ് മാറും..  
അകലങ്ങളില്‍, 
നിന്‍റെ ആകാശങ്ങളില്‍ ഇതേ മഴ പെയ്യുമ്പോള്‍.... നീയും!! 

  

  • Digg
  • Del.icio.us
  • StumbleUpon
  • Reddit
  • RSS

അദൃശ്യചാലകം



അകലങ്ങളില്‍ ഇരുന്നു അറിയുവാന്‍ കൊതിക്കുന്ന, 
ഓര്‍മ്മകള്‍ കൊണ്ട് ആര്‍ദ്രമാക്കുന്ന ആ പ്രതിഭാസം, 
അത് പരസ്പരം തിരിച്ചറിയുന്ന അത്ഭുതം.. 
ഒരു ചെറു ഇലയനക്കം പോലെ 
ഒരു ഹൃദയമര്‍മ്മരം പോലെ 
ഒരു കുളിര്‍കാറ്റു പോലെ മൃദുവെങ്കിലും 
കൊതിയോടെ കാത്തിരുന്ന എന്‍റെ മനസ്സ് 
അവയെ തിരിച്ചറിയുന്നുണ്ട്.. 
ഞാന്‍ കരുതി വച്ച, 
നീ പകര്‍ന്ന ഊര്‍ജ്ജമെല്ലാം 
ഏതു ചാലകത്തിലൂടെ ഞാന്‍ നിന്നിലേക്കെത്തിയ്ക്കും? 
നിഷ്കളങ്കരായ എന്‍റെ സഹവര്‍ത്തികള്‍, 
അറിയാതെ 
ആ ഊര്‍ജ്ജസ്ഫുലിംഗങ്ങള്‍ ഏറ്റു വാങ്ങുന്നുണ്ട്, 
അതിശയം കൂറുന്ന ചില മിഴികളില്‍  
ഞാന്‍ അത് തിരിച്ചറിയുന്നുമുണ്ട്.. 
ദുര്‍ബ്ബലരായ ചിലര്‍ തകര്‍ന്നകന്നു പോകും മുന്നേ 
പ്രസരണനഷ്ടം കൂടാതെ നീയിതു ഏറ്റു വാങ്ങുക..  
കാരണം,
സ്വന്തമെന്നു കരുതി വച്ചതെല്ലാം 
വലിച്ചെറിഞ്ഞു കളയാന്‍ എന്നെ പ്രേരിപ്പിക്കുന്ന 
വിപ്ളവമാണല്ലോ നീ!

  • Digg
  • Del.icio.us
  • StumbleUpon
  • Reddit
  • RSS

സ്നേഹശോണിമ




അന്നാദ്യാനുരാഗം തന്‍ പ്രാണരക്തത്താല്‍
അധികാരമറിയിച്ചപ്പോള്‍ 
ഹൃദയധമനികള്‍ പിടഞ്ഞത് 
ഞാനിന്നുമോര്‍ക്കുന്നു.. 
ഒരു സ്പര്‍ശത്തില്‍ സ്നിഗ്ദ്ധമായ് 
എന്നുള്ളം പോലും ഉണര്‍ന്ന് 
ഒരുക്കിയോരായിരത്തിരികള്‍..
ആ നിമിഷങ്ങളിലാണ് 
നീ സൃഷ്ടികളിലേറ്റം സുന്ദരമായത് 
ഞാനും ഞാനും തമ്മില്‍ 
നടക്കാറുള്ള സംവാദങ്ങളില്‍ 
നീയും നീയും പങ്കു ചേരവേ 
ജയിക്കുന്നതെപ്പോഴും നമ്മള്‍..
ആത്മവഞ്ചനയുടെ ഒരംശവുമില്ലാതെ
നമുക്ക് സ്നേഹിക്കാന്‍ കഴിയട്ടെ; 
നിന്‍റെ ചുണ്ടുകള്‍ ചോപ്പിച്ച 
എന്‍റെ നെറുകയിലെ സിന്ദൂരത്തിനു 
സായന്തനസൂര്യനെക്കാള്‍ ഭംഗിയുണ്ട്
ഞാന്‍ കാണുന്നു നീ മുങ്ങിപ്പോകുന്നത്... 
എന്‍റെ കണ്ണുകളുടെ കടലാഴങ്ങളിലേക്ക്.. 

  • Digg
  • Del.icio.us
  • StumbleUpon
  • Reddit
  • RSS

വിഷു 2014




മേടച്ചൂടിലും 

സുഖമുള്ള ചിരിയോടെ 
സൂര്യനെ നോക്കുന്ന കൊന്നപ്പൂക്കള്‍ ,
ഒരു ആഘോഷത്തിന്റെ നിറവിലാണ് .



വിശാലമാകാശ നീലിമക്ക് താഴെ 
ഈ മഞ്ഞ ചന്തം
ഒരിക്കല്‍ കൂടി വിരുന്നു വരുമ്പോള്‍ 
ബാല്യത്തിന്നോര്‍മ്മകളില്‍ നിന്നൊരു 
വിഷുപക്ഷി പറന്നുയരുന്നു 

സമൃദ്ധിയുടെ കണിവട്ടങ്ങളില്‍
നറുനെയ്യാല്‍ തെളിയിക്കുന്ന
ഐശ്വര്യത്തിന്‍ വിളക്കുകള്‍ 
മത്താപ്പ് കമ്പിത്തിരി പടക്കങ്ങള്‍ 
സന്തോഷത്തിന്നകമ്പടിയാവുന്നു. 

ഈറനണിഞ്ഞ വിഷുപ്പുലരിയില്‍ 
വെള്ളിത്തുട്ടിന്‍ കിലുക്കം കേട്ട്,
കണ്ണടച്ചോടും മനസ്സുകളിതാ
കണ്ണന്‍റെ കാഴ്ചയിലേക്ക്,
നന്മയുടെ കൈനീട്ടത്തിനായ്... 

  • Digg
  • Del.icio.us
  • StumbleUpon
  • Reddit
  • RSS

മാറ്റമില്ലാതെ.....



എന്റെ വികാരങ്ങള്‍ 
ഈ സാഗരനീലിമയിലൂടെ 
നടത്തുന്നു സ്വപ്നാടനം 
കടലുകള്‍ക്കുമപ്പുറം അത് 
അവസാനിക്കുന്നത് ഒരു കാണാക്കരയില്‍...

കുരുങ്ങിപ്പോയ വാക്കുകള്‍ കൊണ്ട്
തുന്നിച്ചേര്‍ക്കപ്പെട്ട എന്റെ അധരങ്ങള്‍
തിരത്താളുകളില്‍ എഴുതുന്നു മണല്‍ച്ചിത്രം
മൊഴികള്‍ വഴി തേടി എത്തുന്നത്
എന്റെ നിതാന്തമൗനപര്‍വ്വത്തില്‍...

ഓരോ പുതിയ രാത്രിയും
എനിക്കായ് കരുതി വച്ച കാഴ്ചകള്‍
ഞാനെന്നോ കണ്ട പകല്‍ക്കിനാവ്
ആര്‍ദ്രമോരോ മോഹത്തെയും മൂടുന്നത്
ആവര്‍ത്തനങ്ങളുടെ തിരശ്ശീല..

തിരയുപേക്ഷിച്ച കാല്‍പ്പാടുകള്‍ കവര്‍ന്ന
നനവ്‌ തേടിയ മണല്‍ത്തരികള്‍
ഒഴിഞ്ഞ കൂട്ടിലെ പ്രതീക്ഷയുടെ തൂവല്‍
മഞ്ഞിന്‍റെ കമ്പിളിപ്പുതപ്പില്‍
മായുന്ന വിഹ്വലതകള്‍...

ഒരു രാത്രിക്കാഴ്ച്ച..

  • Digg
  • Del.icio.us
  • StumbleUpon
  • Reddit
  • RSS

എന്നെ വിട്ട്...


മഞ്ഞു വീണ പുല്‍ക്കൊടികളുടെ 
ആലിംഗനത്തിലമര്‍ന്ന്‍ 
ആകാശവീഥിയിലെ 
ഓരോ നക്ഷത്രക്കണ്ണുകളുടെയും 
തിളക്കത്തിനെ പിന്തുടര്‍ന്ന് 
വെറുതെ കിടന്ന്‍.... 
എത്ര മനോഹരമായ ഒളിച്ചോട്ടം!!

രാത്രിയുടെ നിശ്ശബ്ദതയില്‍
ഒളിച്ചിരിക്കുന്ന ഇടിമുഴക്കങ്ങളും
രാപ്പാടികളുടെ വിഷാദഗാനവീചികളും
നിശബ്ദ തടാകത്തില്‍
അപ്രതീക്ഷിതമായ് കാണപ്പെട്ട
ഒരു അരയന്നവും,
ഒന്നും എന്നെ സ്പര്‍ശിക്കാതെ കടന്നു പോകുന്നു...

ഹിമാലയത്തിന്‍റെ നെറുകയില്‍ നിന്നും
സൂര്യചുംബനത്തിലുതിരും
മഞ്ഞുത്തുള്ളികള്‍ പോലെ
കവിയുന്ന എന്റെ കണ്ണുകള്‍
കാണുന്നതു നിന്റെ മങ്ങിയ രൂപം..
എനിക്ക് ശബ്ദിക്കാന്‍ കഴിയാത്തതെന്തേ?
നിലച്ചു പോയ ഹൃദയത്തില്‍ നിന്ന് ഉത്ഭവിച്ചതാലോ
നിന്റെ നെഞ്ചിലുതിര്‍ന്ന നീര്‍മുത്തുകള്‍
ഉടനുറഞ്ഞു പോയത്..
ഞാന്‍ പോവുകയാണ്..
നിന്നെ വിട്ട്....

  • Digg
  • Del.icio.us
  • StumbleUpon
  • Reddit
  • RSS

മറുജന്മം കൊതിക്കുന്ന പ്രണയം



എന്നില്‍ നിന്നും നിന്റെ ഓര്‍മ്മകളെ
പറത്തിക്കളയുന്നു
വിഷാദം വില്‍ക്കുവാന്‍ വന്ന ഈ കാറ്റ്.. 
ചിലപ്പോള്‍ ഒരു നറുസുഗന്ധം
എന്നെ ഉന്മത്തയാക്കാന്‍ പോന്നത്... 
ഒരു ചെറു സ്പര്‍ശം 
എന്റെ നിയന്ത്രണങ്ങളെ തകര്‍ക്കുന്നത്...
നിന്റെ പേരെഴുതിയ ഒരായിരം നിഴലുകള്‍ 
എന്റെ മനസ്സിന്റെ ചാരത്തില്‍ നിന്നും 
ഫീനിക്സ് പക്ഷികളെ പോലെ 
ചിറകടിച്ചുയിര്‍ക്കുന്നു... 
എന്റെ ശിരസ്സിനു ഭാരം നഷ്ടപ്പെട്ട്
ഞാന്‍ വീണു പോകുമ്പോള്‍ 
വിരുദ്ധ ധ്രുവങ്ങളുടെ ആകര്‍ഷണമാണോ
നിന്റെ കാന്തിക വലയത്തിലേക്ക് 
എന്നെ വലിച്ചടുപ്പിക്കുന്നത്.. 
അതിന്നുമെനിക്ക് വിശദീകരിക്കാനാവാത്ത
വിസ്മയം ആണ്..

  • Digg
  • Del.icio.us
  • StumbleUpon
  • Reddit
  • RSS

മണലാരണ്യത്തിലെ മഴവിരലുകള്‍



എത്ര തനിച്ചാണിന്നു ഞാന്‍.. 
ഒരു പാട്ടിനൊടുവില്‍ 
ഈണം തെറ്റി വീണൊരു 
പാതിരാമഴയില്‍ കൊഴിഞ്ഞ 
മാമ്പൂവിന്‍ തേങ്ങലാണ് 
ഈ മുറി നിറയെ!

വിറയ്ക്കുന്ന വിരല്‍ത്തുമ്പില്‍
നിന്നൂര്‍ന്നു വീണു മരിച്ച
അനാഘ്രാത കുസുമങ്ങള്‍ക്ക്
പറഞ്ഞു തീരാത്ത കഥകളുടെ
നൊമ്പരം നെഞ്ചിലേറ്റുന്ന
ശാഖിയുടെ മിഴിനീര്‍ തര്‍പ്പണം..

മരവിക്കുന്ന തണുപ്പില്‍ ഒരു
ഊഷ്മളമൃദു സ്പര്‍ശത്തിനെ
വരവേല്‍ക്കാന്‍ കാതോര്‍ത്ത
വാതില്‍പ്പാളികള്‍ക്കിടയിലൂടെ
ഇക്കിളിയിട്ടടര്‍ന്ന പോല്‍
പാറി നിറയുന്ന മഴപ്പാറ്റകള്‍..

എന്നിലും നിന്നിലുമായി
ഏറെ പങ്കുവയ്ക്കപ്പെട്ട
കുരുന്നോര്‍മ്മകളുടെ നനവില്‍
എന്നോ അന്യമായ ഗന്ധം തേടുന്നു
ഇന്നുമോരോ മഴവിരലും
ഈ മണല്‍ക്കാട്ടില്‍ പോലും ...

  • Digg
  • Del.icio.us
  • StumbleUpon
  • Reddit
  • RSS

ഓര്‍മ്മയുടെ പടവുകള്‍




ഹൃദയം പിടയുമ്പോള്‍ മാത്രം 

ഉതിരുന്ന ചില സ്ഫടിക ചിരികളുണ്ട്; 
തിരികെ ഇറങ്ങാന്‍ തുടങ്ങുമ്പോള്‍ 
മാത്രമാവണം ചില 
നോവുകളുടെ ഉയരമറിയുന്നത്!

ഇടയ്ക്കിടെ 
കണ്ണാടി നോക്കി മിനുക്കി,
ചുംബിച്ച് മുഖം മൂടി അണിയിക്കുന്ന
ഭൂതകാലത്തിന്‍ പരിചിത പടവുകള്‍
ഓര്‍മ്മിപ്പിക്കുന്നതാവണം
നിന്റെ മനസ്സ്!
വന്ന വഴിയെ,
വ്യര്‍ത്ഥം ഓടിക്കയറുന്ന
ഭ്രാന്താവണം ചിന്തകള്‍!
ശ്വസിക്കുമ്പോള്‍ കത്തിപ്പടരുന്ന
ലഹരിയുടെ താഴ്‌വരയില്‍
മുന്തിരിവള്ളികള്‍ ചുരത്തുന്ന
വീഞ്ഞാവണം നീ!
മനപൂര്‍വ്വം ധിക്കരിച്ച്
നിന്നില്‍ നൃത്തം ചെയ്തു മദിക്കുന്ന
ചിലങ്കയിട്ട കാവ്യശില്‍പം
മാത്രമാവണം ഈ ക്ഷണികജീവിതം !


  • Digg
  • Del.icio.us
  • StumbleUpon
  • Reddit
  • RSS

നിലാക്കുറുമ്പി




ചിന്തകളും സ്വപ്നങ്ങളും 

ഒന്നിച്ചൊരു പൂവായ്‌ വിടരില്ലെന്ന്
അറിയുമ്പോഴും , 
ആശകളത്രയും 
നിശബ്ദതയുടെ ഇതളുകളില്‍

മായ്ച്ചു മായ്ച്ചെഴുതി 
നീറിക്കരഞ്ഞൊരു
പേരറിയാപ്പൂവ്..

വ്യഥയുടെ വേലിപ്പടര്‍പ്പില്‍
പരിഭവ പടവുകള്‍
ഒന്നൊന്നായ് ഇറങ്ങിയ വെളിച്ചം,
അവളെ തഴുകവേ
ഒരു ചിത്രശലഭം പോലുയിര്‍ത്ത്
പിന്നെ ചിറകൊതുക്കി
വീണ്ടും തിരഞ്ഞെത്തിയ
അതിഥിയുടെ മാറോടണഞ്ഞു..

കതിരവവിരലുകളവളെ
നിലാവിന്നിഴ ചേര്‍ത്ത
പുതപ്പാല്‍ മൂടി
ഹൃദയത്താല്‍ വിളിച്ചു
അര്‍ത്ഥമറിയാപ്പൂവേ,
നീ "നിലാക്കുറുമ്പി!"

  • Digg
  • Del.icio.us
  • StumbleUpon
  • Reddit
  • RSS
Related Posts Plugin for WordPress, Blogger...