RSS
Container Icon

അരികെ തൊട്ടരികെ



കറുത്ത കിനാക്കളുടെ മേഘപാളികള്‍
വകഞ്ഞുമാറ്റി ‍നിന്റെ നീലിമയില്‍ അലിയണമെനിക്ക്
നിന്റെ സ്നേഹമാണ് ഈ നിറത്തിന്.
മിഴികളടഞ്ഞ മാത്രയില്‍ ചുമ്പിച്ചു കവര്‍ന്ന മേഘത്തുണ്ടുകള്‍-
നീലയായെന്റെ സിരകളില്‍ തെളിയും.
എനിക്കപ്പോള്‍ നിന്റെ മണമായിരിക്കും.
ഒരിക്കല്‍,
കൈതൊടും ദൂരമുള്ളോരമ്പിളിയില്‍ ഞാനെന്റെ ഹൃദയം കോര്ക്കും,
ലോകത്തിന്റെ നെറുകയില്‍ എന്റെ സ്നേഹം പ്രകാശിച്ച്-
നിലം തൊട്ടു നിന്റെ പേര് വിളിക്കും,
നിലാവിലെങ്ങും തെളിയുന്ന ഞാന്‍ നിന്റെ കൈക്കുമ്പിളില്‍ തുടിക്കും.
ദിക്കറിയാത്ത കാറ്റിന്റെ ദൂതിനെ കാണാതെ എന്നില്‍ ചേര്‍ന്ന് നിന്നപ്പോഴെല്ലാം ‍
മൊഴിയാന്‍ മടിച്ച നാവില്‍,
നിന്റെ ഹൃദയം ചേര്‍ത്തൊരു വാക്ക് ഞാനിവിടെ എഴുതിച്ചേര്‍ക്കും ,
അരികെ തൊട്ടരികെ....
നിന്റെ ചിന്തകള്‍ വാനോളമുയരുമ്പോള്‍ മഞ്ഞിന്റെ മുഖമുള്ള എന്നെ കാണും,
നീയെന്നെ തിരിച്ചറിയുന്ന നിമിഷം, ഞാനൊരു നക്ഷത്രമായ്‌ മാറും.

  • Digg
  • Del.icio.us
  • StumbleUpon
  • Reddit
  • RSS

മറവിയില്‍ നിന്നൊരു വരം





എല്ലാം മറവിയിലേക്കാണ് ,

മഴയുടെ ആരവം അറിയാതെ പോവുന്ന ബാല്യങ്ങള്‍,

ഓര്‍മയില്‍ ചികഞ്ഞു ഒരു കഥയില്‍ പെയ്യിക്കാന്‍,

വാക്കുകള്‍ക്കു കഴിയുമോ!

ആ, കുളിരു പകരാന്‍ വരികള്‍ക്കാവുമോ!

പച്ചപ്പില്‍ പൊതിയുന്ന സ്നേഹമാണ് മഴ.

മണ്ണിന്റെ ഗന്ധത്തില്‍ മനസ്സ് നിറയുന്ന അനുഭൂതി.

വര്‍ണ്ണിക്കാന്‍ കഴിയാതെ മനസ്സിലും,

പകര്ത്തിയവ പുസ്തകതാളിലും ഒതുങ്ങുമോ!.

തപിക്കുന്ന ഹൃദയത്തില്‍ ഒരിറ്റു തുള്ളിക്കായ് -

വിയര്ക്കുമ്പോള്,‍ ഗന്ധര്‍വനെ കാക്കാതെ -

മഴക്കായ് ‍ഞാനൊരു മരം നടുന്നു,

വിണ്ടുകീറുന്ന മനസ്സുകളെ നികത്താന്‍‍ അവള്‍ക്കു കഴിയും!

സങ്കല്‍പ്പങ്ങളില്‍ മഴ മെനയാതെ,

എന്റെ മക്കളും,അവളെ നനഞ്ഞറിയട്ടെ!


 

  • Digg
  • Del.icio.us
  • StumbleUpon
  • Reddit
  • RSS

ഓര്‍മ്മച്ചെപ്പ്




ചിതലിനോട് മത്സരിച്ചിന്നുഞാനെന്‍ ഓര്‍മ്മച്ചെപ്പ് തുറന്നു.

വരികള്‍ മാഞ്ഞും മറഞ്ഞും കീറലുകള്‍ വീണ എന്റെ മനസ്സുപോലെ,

മണ്ണ് ചികഞ്ഞു മാറ്റിയോരെഴുത്തെന്‍-നേര്‍ക്ക്‌ നീണ്ടു.

കരളിന്റെ പാതിയില്‍ നിന്റെ മുഖവും ചിരിയും ചിത്രങ്ങളും-

ഏതു ലഹരിയിലുമെന്നെ തളര്ത്തുമ്പോഴും,

അമൂല്യമായതൊന്നും ഇല്ലാതിരുന്നയെന്‍ കലവറയില്‍-

നിധിപോലെ സൂക്ഷിച്ച നാല് വരികള്‍.

നിറമുള്ളതും നിറമില്ലാത്തതുമായനേകം കുപ്പികളില്‍-

നുരഞ്ഞു പൊങ്ങിയ പ്രണയമിന്നിതായെന്‍ പാനപാത്രം നിറക്കുന്നു.

സിരകളില്‍ പടരുന്ന തീയ്യിലും കത്തിതീരാതെ നീ- 

ഓരോ അണുവിലും പടര്‍ന്നു കയറുന്നു വിഷം തീണ്ടിയപോല്!‍ 

പാതിമരിച്ച എന്നെ സ്വതന്ത്രമാക്കുക! 

അടയുന്ന കണ്ണുകളില്‍ കാഴ്ചകളെല്ലാം ഒടുങ്ങുമ്പോള്‍, 

അവശേഷിച്ച തുടിപ്പുകള്‍ നേര്‍ത്തു തുടങ്ങുമ്പോള്‍, 

എന്റെ ഹൃദയം എനിക്കുവേണം!

പലതവണയുരുവിടും നാവിലൊരു നുണ സത്യമാവുമെങ്കില്‍-

പറയുക, നീ എന്നെ സ്നേഹിച്ചിരുന്നുവെന്ന്!

  • Digg
  • Del.icio.us
  • StumbleUpon
  • Reddit
  • RSS

നൊമ്പരമഴ



ഒരു മഴപ്പാതിരയ്ക്കാണ്,

പവിഴം പോല്‍ തിളങ്ങുമവള്‍-

ഒരു തുള്ളിയുടെ ഭാരത്തിലൊതുങ്ങി,

എന്നിലേക്ക്‌ ഞെട്ടറ്റു വീണത്. 

സാന്ത്വന സ്പര്‍ശത്തില് ഉയരുന്ന ഹൃദയസ്പന്ദനം.

തലോടിയ വിരല്‍തുമ്പില്‍ മരണമിടുപ്പുകള്‍,.! 

മിഴിനീര്‍ പൊഴിച്ചു ഞാനവളെ നനച്ചില്ല,

മോഹഗന്ധത്തിലമരുമവള്‍ ഒരുവേള, ഉണര്ന്നെങ്കിലോ!

സ്നേഹത്തിന്റെ വെളുത്ത ഇതളുകള്‍, 

കരച്ചിലായ്  പെയ്തു വീഴുന്ന മഴയില്‍ ഒരോര്‍മ്മ!‍

കിനിഞ്ഞിറങ്ങുന്ന സ്വപ്നങ്ങളില്‍ താനേ ചുവക്കുന്ന-

അവള്‍ നഷട്ടവസന്തത്തിന്‍ പവിഴമല്ലി ! 

ഇന്നും,കരള്‍പൂവില്‍ വിരിഞ്ഞു നില്‍ക്കും മഴനൊമ്പരം.

  • Digg
  • Del.icio.us
  • StumbleUpon
  • Reddit
  • RSS

കരിവള



കരിവള തുണ്ടില്‍ നിന്റെ കൈമുറിഞൊരിറ്റു- 

ചുവപ്പെന്നില്‍ പുരണ്ടപ്പോള്‍ കരള്‍-

പിടഞ്ഞിറങ്ങിയ തുള്ളിയൊന്നില്‍‍,

നിറചേര്‍ച്ചയെന്തെന്ന് ഞാനറിഞ്ഞു,

ഉറക്കത്തില്‍ ഇളം ചുണ്ടില്‍ വിരിഞ്ഞു മാഞ്ഞ-

പുഞ്ചിരിയില്‍ നിറമെല്ലാം മറന്നു നിന്നു,

കാലം മാറിയും, നീ വളര്‍ന്നും 

ഇരുട്ടിന്റെ മറ മാറ്റി പിറന്ന താരകത്തിന്‍ ‍-

പാല്‍പല്ലും, ഇടറുന്ന ചുവടും-

അമ്മതന്‍ ഹൃത്തില്‍ വളരാത്ത ഓര്‍മ്മകള്‍!!!1!

  • Digg
  • Del.icio.us
  • StumbleUpon
  • Reddit
  • RSS

പരാതി

 
 
ഞാന്‍ 

....നിന്നില്‍ നിന്നും അടര്‍ന്നു വീഴാന്‍-

തുടങ്ങുമൊരു മൊട്ട്.

കരയാതെ പിടിച്ചു നില്‍ക്കാന്‍-

കരളില്‍ ഉറപ്പു പോര! 

കനക്കുന്നു എന്‍ ഹൃദയം- 

നുറുങ്ങി നിന്‍ ഓര്‍മകളാല്‍‍!

മുഖം തരാതെ മൗനം പേറുന്ന-

കറുത്തദിനങ്ങളെന്നില്-

ചിരി മറന്നു നില്‍ക്കുന്നു. 

ചെവിയോരം പിറുപിറുത്-

ചിന്തകള്‍ എന്നെ ഭ്രാന്ത്-പിടിപ്പിക്കുന്നു.

മടങ്ങികൊള്‍ക-

പരിഭവിച്ചു നിന്റെ വഴിമുടക്കാതെ-

വിരിയാന്‍ മറന്നൊരു മൊട്ടായി-

ഞാന്‍ പൊഴിഞ്ഞു തീരാം!‍

  • Digg
  • Del.icio.us
  • StumbleUpon
  • Reddit
  • RSS

പരിഭവം



തേങ്ങി തുടങ്ങിയ എന്റെ വരികളെ-

ഇഷ്ട്ടപ്പെടാന്‍ മറന്നൊരു താള്.

വാക്കുകള്‍ക്കിടയിലൂടെ നിന്‍ നേര്‍ക്കുമാത്രം-

നീളുമെന്‍ കണ്കളെ -

എന്നോളമിന്നും അറിയാത്ത-

വ്യര്‍ത്ഥ-ബന്ധങ്ങള്‍ക്കിടയില്‍ ഒളിപ്പിക്കുന്നുവല്ലോ!

പ്രണയം മണക്കുന്ന നിന്റെയൊരു വാക്കില്പോലും-

സ്വര്‍ഗം തീര്‍ക്കുമീയെന്നെ-

സ്നേഹത്തിന്നായലഞ്ഞു-വീണൊരു ചങ്ങലയില്‍-

മറന്നുപോയോ!!

ഇന്നിനും നാളെയ്ക്കുമിടയിലെ ദൂരത്തുപോലും -

നിന്നില്‍- ഞാനില്ലാതെ പോകുന്നുവെങ്കില്‍-

ഒരുമിച്ചൊരായുസ്സിന്റെ വാഗ്ദാനം നീയെനിക്കെങ്ങിനെ നല്‍കും! 

  • Digg
  • Del.icio.us
  • StumbleUpon
  • Reddit
  • RSS

പ്രജനിക



കരഞ്ഞു വാടുന്ന കുഞ്ഞിനെയൊന്നു-
ചേര്‍ത്തു പിടിക്കാന്‍ മടിച്ചെന്ന പോലെ-
തിളക്കമറ്റ മഞ്ഞിച്ച കണ്ണുകള്‍,
നിസ്സങ്കതയോടെ, ‍
മാറില്‍ അമര്‍ന്ന കുഞ്ഞികൈകളെ മാറ്റുന്നു-
കുഞ്ഞിന്റെ മുഖം കാണാന്‍ കഴിയാത്ത വിധം-
അവളൊരു അന്ധയാണെന്ന് തോന്നിച്ചു!
ദീര്‍ഘനേരത്തെ വിരസത തീര്‍ത്ത്,
നടന്നടുത്ത പുരുഷനും സ്ത്രീക്കും കുഞ്ഞിനെ കൈമാറി-
തിരിഞ്ഞൊന്നു നോക്കാന്‍ പോലും ഭയപെട്ട്-
ഏതോ അദ്രിശ്യമായ കരങ്ങളാല്‍ ചലിക്കും വിധം
ജീവനില്ലാത്ത കാലടികള്‍ പതുക്കെ നീങ്ങുന്നു!
നിശബ്ധമായ ഇടനാഴിയിലൊരു കോണില്,
കണ്ണീരു വീഴാത്ത പൊട്ടിക്കരച്ചിലിന് ‍ ഈരടികള്‍ ,
മുഖം മൂടിപ്പിടിച്ച സാരിത്തുമ്പ്-
നനയാന്‍ മടിച്ചെന്നപോലെ!
ഒഴുകിതീര്‍ന്നു ദുഖമൊന്നു ശമിക്കാന്‍-
അവളില്‍ കണ്ണ്നീരില്ലെന്നു തോന്നി.
സ്ത്രീയെ,
പാലും രക്തവും ഊറ്റിക്കുടിച്,
നിന്നസ്ഥികളെ വെള്ളമാക്കി-ഒടുവില്‍
അനാഥാലയത്തിനും, തെരുവോരങ്ങളിലും ബാക്കിയാക്കി-
അമ്മയെന്ന് വിളിക്കാന്‍ മടിച്ച്, മറവിയിലേക്ക് പോവുന്ന-
പുന്നാര മക്കള്‍ നല്‍കുന്ന പരിവേഷത്തിന്റെ-
വികൃത മുഖം നിന്നിലില്ലല്ലോ!
വാടകക്കൊരു അമ്മയെങ്കിലും നീ ഭാഗ്യമുള്ളവള്‍!
സൃഷ്ട്ടിയുടെ ഏതോ ഒരു നിമിഷത്തില്‍,
പെണ്ണിന്റെ പൂര്‍ണ്ണത നിഷേധിക്കപെട്ട-
അമ്മമാരുടെ സ്വപ്‌നങ്ങള്‍ നിക്ഷേപിച്ച നിധി-
നിന്റെ ഗര്‍ഭ-പാത്രം!
അടുത്ത പത്തുമാസത്തിന്നവകാശി,
വേച്ചു പോകുന്ന മനസ്സും ശരീരവും ചേര്‍ത്തു പിടിച്ച്,
അവള്‍ വീണ്ടും നടന്നു നീങ്ങുന്നു
മക്കളാല്‍ ദുഃഖം പേറന്ടാത്തവള് ,നിധിയുടെ കാവല്‍ക്കാരി!

  • Digg
  • Del.icio.us
  • StumbleUpon
  • Reddit
  • RSS

പ്രകൃതി






പച്ചയെ പൊതിഞ്ഞോരായിരം തുള്ളികള്-


നനുത്ത ചാറലില്‍ തണുത്തു നിന്‍ ചാരെയിരിക്കവേ-

പുല്ലിനെയും, മണ്ണിനെയും, മരത്തെയും- 

പിന്നെ, അവളെന്നെയും നനച്ചു രസിക്കുന്നു... 

മണ്ണിന്റെ ഗന്ധവും മഴയുടെ സുഖവും-

നീന്തിതുടിച് നിന്നെ അറിയാനൊരു മനസും....

ഈ സമയം ഇവിടെ നിലയ്ക്കുമെങ്കില്‍,

തീരാത്ത മോഹങ്ങള്‍ പൊലിയാതെ എന്നില്‍ പുനര്‍ജനിക്കട്ടെ.....

ഈറനാം പ്രകൃതിയിലോരോ തുടിപ്പും സാക്ഷിയെങ്കില്‍-

നിന്റെ പ്രണയമെന്നില് പെയ്തുതീരട്ടെ....

  • Digg
  • Del.icio.us
  • StumbleUpon
  • Reddit
  • RSS

ദിവാ സ്വപ്നം




ഇന്നിതാ ഒരു സ്വപനത്തിലെക്ക്

കണ്ണ് തുറക്കുന്നു, അവിടൊരു -

ദേശാടനപക്ഷി ഞാന്‍ !

എന്തെന്തു കാഴ്ചകള്‍,

നഷ്ടങ്ങളും നേട്ടങ്ങളും ഇല്ലാത്ത,

അനന്തമായ യാത്രകള്‍! 

ഭാരമില്ലാത്ത തൂവലിനേക്കാള്‍-

സുതാര്യമായ മനസ്സുമായി,

കാലത്തെ പ്രണയിച്ചങ്ങിനെ-

പറന്ന് പറന്ന് 

ചിറകു കഴയ്ക്കുവോളം-

വിശ്രമമില്ലാത്തൊരു യാത്ര! 

  • Digg
  • Del.icio.us
  • StumbleUpon
  • Reddit
  • RSS

ദൃക്സാക്ഷി



വെളിപ്പെടാതെ നീ എന്നെ മറന്നെന്നു നടിക്ക,
ഇരുളിന്റെ മറവില്‍ തിരഞ്ഞെത്തുന്ന 
എന്റെയീ തിരിവെട്ടത്തില്‍ -
ഞാന്‍ നിന്നെയും കാണാതെ കണ്ണടക്കാം,
നക്ഷത്രത്തിളക്കത്തില്‍,
നിറഞ്ഞ കണ്ണിലൂടൊരു നീര്‍ക്കണം-
ഒഴുകിയെന്റെ വരികളില്‍ തൊട്ടതും-
ഇനിയും പകര്താത്ത ഓര്‍മ്മകള്‍ക്കൊപ്പം,
ഞാനെന്റെ ഹൃദയത്തില്‍ സൂക്ഷിക്കാം

  • Digg
  • Del.icio.us
  • StumbleUpon
  • Reddit
  • RSS

പ്രഹേളിക



കാറ്റിന്റെ ചിറകിലേറി മഴയുടെ നാട്ടിലേക്കൊരു യാത്ര പോവണം 

പച്ചപുതച്ച മലഞ്ചെരുവില്‍ മഴയെ കാത്ത് തനിച്ചിരിക്കണം 

‍അവള്‍ വരുമ്പോള്‍ ആദ്യതുള്ളിക്കായൊന്നുയര്‍ന്നു ചാടണം 

കൈക്കുമ്പിളിലവളുടെ തണുത്ത രുചി നിറയ്ക്കണം 

ചന്നം പിന്നം ചാറിത്തുടങ്ങുമ്പോള് 

കലപില പറഞ്ഞവളെ ആര്‍ത്തു പെയ്യിക്കണം 

നടന്നും ഇരുന്നും കിടന്നും മഴ കാണേ-

‍മനസ്സില്‍ ഒതുക്കിയ മോഹങ്ങളെല്ലാം നനഞ്ഞറിയണം

രാഗലയങ്ങളിഴ ചേരുകില്ലെങ്കിലും 

എന്‍ പ്രിയ ഗാനങ്ങള്‍ ഉറക്കെ പാടണം

‍ഓര്‍മയിലെ ചിരിനുറുങ്ങില് തലയറഞ്ഞെന്‍ മിഴിയുതിരണം, 

മഴയൊച്ചയതിനെയും കവച്ചെന്നെ നനയിക്കുമ്പോള്‍-

ചുമരുകളെ ഭയക്കാതെനിക്ക് പൊട്ടിക്കരയണം 

തമ്മിലറിഞൊടുവില്‍ തിരികെയെത്തുമ്പോള്‍-

വിലക്കുകളും ശാസനകുളും എന്നെ ബന്ധിക്കരുത്.

നനഞ്ഞ താരയിന്‍ പൊരുള്‍ തേടിയവരന്നെ താണ്ടുമ്പോള്‍ 

കാറ്റിന്റെ ചിറകിലേറി എനിക്കൊരു പ്രഹേളികയാവണം !


  • Digg
  • Del.icio.us
  • StumbleUpon
  • Reddit
  • RSS

ഉറങ്ങുന്ന പകലുകള്‍


ഉറങ്ങുന്ന പകലുകള്‍ .
കത്തുന്ന സൂര്യന്റെ ജ്വലിക്കുന്ന കിരണങ്ങളില്‍
കണ്ണ് നീര്‍ വറ്റിയൊരു സൂര്യകാന്തി,
അന്തമെഴാത്ത ഓര്‍മകളില്‍-
വിഷാദത്തിന്റെ താളം.
മീട്ടുവാന്‍ മടിച്ച വീണയില്‍ പാട്ട് മറന്നപോല്-
നിറമില്ലാത്ത സ്വപ്‌നങ്ങള്‍,
ശോകപുഷ്പങ്ങള്‍ ഉറങ്ങാത്ത രാത്രികളില്‍,
രാക്കിളിതന്‍ വിരഹാര്‍ദ്ര ഗാനം കേള്‍ക്കാന്‍-
മറന്നുപോയ താരകം.
വിടപറയുമ്പോഴും,
ഓമലേ, നിന്നെയെനിക്കിഷ്ടമാണ്!
സ്നേഹനൊമ്പരങ്ങള്‍ മായാത്ത വെന്‍താരകമേ-
അനുദിനം നീയെന്നില്‍ തെളിയുക-
നിലയ്ക്കാത്ത പ്രാര്‍ത്ഥനയായ്!

  • Digg
  • Del.icio.us
  • StumbleUpon
  • Reddit
  • RSS

ജീര്‍ണ്ണയാനം



അഴുക്കുചാലിന്റെ മൂലക്കിരുന്ന്-

വ്രണപ്പെട്ട മനസ്സിന്റെ വിങ്ങലില്‍-

പെണ്ണെന്തെന്നറിയാത്ത ചില കോമരങ്ങള്‍-

നഗ്നതയുടെ നാവെറിയുന്നു.


മറക്കാത്ത മാറിലും, ഒളികണ്ണിട്ടരക്കെട്ടും -

അളക്കുമവന്റെ ജീര്‍ണ്ണിച്ച മനസ്സില്‍-

മുലയൂട്ടിയ അമ്മയവളും-

പെണ്ണെന്ന പേരില്‍ പരിഹാസ്യയാവുന്നു . 


പൌരുഷം മുഖത്തണിഞ്ഞു നപുംസക-

ജീവിതം നയിക്കുന്ന ഭോഷാ,

നിന് ‍നാവു ചെന്നായ്ക്കും കണ്ണുകള്‍ കഴുകനും നല്ക-

മേലില്‍, തൃഷ്ണയറിയുവാനുതകാതെ പോകട്ടെ !

  • Digg
  • Del.icio.us
  • StumbleUpon
  • Reddit
  • RSS

പ്രതീക്ഷ


 



എനിക്കറിയാമായിരുന്നു നീ, എന്നെ മറക്കുമെന്ന്,

എന്നാകുലതയില്‍ അടഞ്ഞ കാതുകള്‍- ‍

അലസമായ് കേട്ട് മറന്ന വാക്കുകള്‍ -

മുഴുമിക്കാനാവാതെ നൊമ്പരപ്പെട്ടു വഴിമാറിയത്,

ഞാനറിഞ്ഞുമറിയാതെ പോയോ!


ഹൃദയത്തിന്‍ പാതിയില്‍ ബന്ധിച്ച,

കൈകളെന്നെ കവര്‍ന്നടുപ്പിച്ച നിമിഷമോ, 

ഏതോ ഏകാന്തയാമത്തിലുണര്‍ത്തി-

എന്നിലേക്ക്‌ പറന്നടുക്കുമാ കിളി കൂജനമോ,

വീണ്ടുമെന്‍ കണ്ണ് നിറയ്ക്കുന്നു. 


കൂരിരുള്‍ മൂടിയോരന്ത്യ ചുമ്പനത്തില്-

തളര്‍ന്ന ചന്ദ്രനും മറഞ്ഞു തുടങ്ങി.

ഉരുകിയുറഞ്ഞ ചിന്തകള്‍ ,

നിന്നിലെരിഞ്ഞു തീരുന്നതേ ഉത്തമമെന്നോതി-

യോരിറ്റു വെളിച്ചമെന്നെ ഉറ്റു നോക്കുന്നു. 


  • Digg
  • Del.icio.us
  • StumbleUpon
  • Reddit
  • RSS

തുളസി









അന്നാണ് ഞാനത്രയേറെ നിന്നെ ശ്രദ്ധിച്ചത്-

കൊരുത്തിട്ട മാലയില്‍ ഒന്നാവുന്ന-

രണ്ടു ജീവിതങ്ങള്‍.

ഒപ്പം, നീ എന്റെ മനസ്സിലും.

പിന്നെ ഉണര്‍ന്ന പുലരിയിലെല്ലാം ‍ കണ്ടു,

ചാരെഅണഞ്ഞ കണങ്ങള്‍ ഓരോന്നും -

നിന്‍ നറുമണം നുകര്‍ന്ന് മനം മറന്നിരിക്കുന്നത്..

അവയോടു മത്സരിച്ചെന്നവണ്ണം-

ഇളം വെയിലവയില്‍ മഴവില്‍ തീര്‍ത്ത്‌ രസിക്കുന്നു.

നൈര്‍മല്യമേറും കതിരുകള്‍ പൊഴിഞ്ഞിടം-

നിന്നോളം ശുദ്ധമായ്‌ പവനനില്‍ അലിയുന്നു

അത്ഭുതപ്പെടുത്തുന്ന-എന്‍ ലാളിത്യമേ-

അസൂയ-പൂണ്ടെന്റെ വിരലുകള്‍-

നിന്നെ നുള്ളിയെടുത്ത് മുടിയില്‍ ചൂടി-

അഹങ്കരിക്കാന്‍ വെമ്പല്‍ കൊള്ളുന്നു.


  • Digg
  • Del.icio.us
  • StumbleUpon
  • Reddit
  • RSS

"ആള്‍ക്കൂട്ടത്തില്‍ തനിയെ"







ഇവിടെ ഇത്തിരി നേരം ,

ഓര്‍മകളില്‍ കളി വള്ളം തുഴഞ്ഞൊരു, 

കുഞ്ഞു പാദസരം കിലുങ്ങി കരയിച്ചതില്‍,

പൊഴിഞ്ഞ മുത്തിനായ് തിരഞ്ഞു കുറച്ചു ദൂരം !


കരിയില കരയുമൊരിടവഴിയില്‍,

കണ്ടെടുത്തൊരാ വെള്ളിമുത്തിന്റെ മനസ്സ് പോലെ, 

നുറുങ്ങിയും കിലുങ്ങാതെ പിണങ്ങിയും, 

ഒരു തൊട്ടാവാടിയായ് ഞാനിന്നും നിന്നരികെ!


ചിന്തകളെ ഭ്രാന്ത് പിടിപ്പിച്ചുരുകിനീറും, 

ദിനങ്ങളോരോന്നും പിറുപിറുത്തിഴയുമ്പോള്,‍ 

നിഴല്‍ വീഴ്ത്താത്ത നിലാവിന്റെ ശോഭയില്‍,

നിന്നെ മറന്നൊരു കോണിലിത്തിരിനേരം!


പതഞ്ഞു പാറിയ നീര്‍കുമിളകള്‍ പോലെ, 

മിഥ്യാസങ്കല്‍പ്പങ്ങളില്‍ ഞാനുമലഞ്ഞെങ്കില്‍,

മറവിയെ മോടിപിടിപ്പികാത്തമനസ്സുമായ്,

കുപ്പിവള തുണ്ടിലെന്‍ ‍ചിരിവിതറി ഇന്നുമിരുന്നേനെ!


  • Digg
  • Del.icio.us
  • StumbleUpon
  • Reddit
  • RSS

ചുവന്ന ഹൃദയം







പാതിമയക്കത്തിലെന്‍ ചില്ലുജാലകം-

ഞരങ്ങിയതോ അതോ-

നിന്റെ കരടുള്ള പ്രണയത്തിലെന്‍-

ഹൃദയം കിനിഞ്ഞു കരഞ്ഞതോ! ‍



തൂവെള്ള തൂവാലയില്‍ -

നീ തന്ന പനിനീര്ദലങ്ങള്‍,

ചോരതുപ്പി ചുവന്നിന്നെന്നെ മറന്നതോ-

അതോ അവ സ്വയം മരിച്ചതോ!


ഇളം വെയില്‍ പതിച്ചെന്‍-

കണ്കള്‍ തുടിച്ചു നിന്നെ തിരഞ്ഞൊരു -

തുള്ളി പൊഴിച്ചതോ അതോ 

അറിഞ്ഞുകൊണ്ട് തന്നെ നീ അടര്ന്നതോ!


ഓര്‍മ്മകള്‍ക്കിപ്പുറം,

വീഞ്ഞിന്റെ ചുവപ്പില്‍ കരടേതുമില്ല

നിന്റെ പ്രണയം കരുതാന്‍ തൂവാലയുമില്ല 

സന്തോഷത്തിന്നശ്രുധാരയില്-

നോവുന്ന വിരഹമില്ല ദു:സ്വപ്നങ്ങളുമില്ല!


പ്രണയം, അതെന്റെ മനസ്സാണ്-

തുടിപ്പുകള്‍ ശേഷിച്ച അമൂല്യ ജീവന് ‍വസിക്കുമെന്‍-

ചുവന്ന ഹൃദയം, അതെന്നിലിന്നും ഭദ്രം

നീ മറന്നതുമതാണ് ‌!

  • Digg
  • Del.icio.us
  • StumbleUpon
  • Reddit
  • RSS

അന്ധവിശ്വാസം




പച്ചപുല്‍ച്ചാടി,

പണവുമായ് ചാടി വരുന്നവന്‍! 

മനുഷ്യന്റെ കണ്ടുപിടുത്തം!

പണം എന്തെന്നറിയാത്തവന്-

കൌതുകത്തിന് വിളിച്ച ‍പേരാവാം! 

ഒരുവന്റെ നാവു പോലും-

അറിയാതെ പോവുന്ന,

ഏവരിലും നിന്റെ മൌനം -

ഒരു പ്രതീക്ഷയാണ്!

മറവിയുടെ മേശവലിപ്പില്‍ ‍-

കാര്ന്നുപോവാതെ കുറച്ചുറുപ്പിക കിട്ടിയെങ്കില്‍-

അവന്റെ ഭാഗ്യം ചുമന്നിനി-

വേറിടത്തേക്ക് പറക്കാന്‍ അനുവാദമില്ല -

ചോനനുറുമ്പുകള് നിന്നെ പൊതിയുമ്പോള്‍-

നിന്റെ സമ്പാദ്യം അവനില്‍ സുരക്ഷിതം,

അവിടെ, നിന്റെ മരണമല്ല,

അവന്റെ വിശ്വാസമാണ് പ്രധാനം!

  • Digg
  • Del.icio.us
  • StumbleUpon
  • Reddit
  • RSS

നൈമിഷിക വൈരം








മുളം തണ്ടില്‍ കാച്ചിക്കുറുക്കിയ -

വൈരത്തിന്‍ ‍ തിളക്കത്തിലിന്നൊരു -

പുലരി കൂടി പിറന്നെന്നില്‍ നിറഞ്ഞു. 

ചെത്തിമിനുക്കാത്തയീ കല്ലിന്‍-

വിലമതിക്കാത്ത സാമിപ്യത്തിലോ ,

ഉയര്ന്നുനില്‍ക്കുമീ മുളയിലക്കും ഭാരം.

കത്തുന്ന രശ്മിയിലുരുകാതെ നീയെന്റെ-

കാതിനിത്തിരി-വട്ടത്തിലിടം തേടിയാല്‍-

ഏഴുനിറത്തിലും സുന്ദരിയായ നിന്റെ-

ചൈതന്യത്തില് ഞാനൊരു പൌര്‍ണമിയാവും !

  • Digg
  • Del.icio.us
  • StumbleUpon
  • Reddit
  • RSS

സൈക്കിള്‍








മുറിവേറ്റതെങ്കിലും,

കാല്മുട്ടിലും കൈമുട്ടിലും-

മാഞ്ഞുപോവാതെ പോറലായ്-

കൈവിട്ടു പറന്ന സുഖമുള്ള ഓര്‍മ്മകള്‍. 

കമ്മ്യുണിസ്റ്റ് പച്ചയും ഉപ്പും-

നീറി ഒഴുകുമ്പോഴും-

ആശ്രയമില്ലാതെ ആദ്യമായ്-

വീഴ്ചകളെ മറന്നു,

ചവുട്ടിപ്പോയ ഇടവഴികള്‍!

കാലത്തിനൊപ്പം പുതിയ രൂപങ്ങളില്‍ -

യാത്ര തുടരുമ്പോഴും-

നിന്നോളം സുന്ദരമായ ഓര്മ-

നല്‍കുവാന്‍‍ വേറൊന്നിനും ആവുന്നില്ലല്ലോ -

എന്റെ കൊച്ചു സുഹൃത്തേ!

  • Digg
  • Del.icio.us
  • StumbleUpon
  • Reddit
  • RSS

"പ്രണയ മുല്ല"

 



 









രാവുകളെ മത്തുപിടിപ്പിക്കുന്ന പാതിരമുല്ലയായ് -

നീയെന്‍ വരികളില്‍ പൂക്കുക,

ഒരു ഞൊടിയില്‍ ‍ ശ്വാസം നിലപ്പിച്ചൊരു-

നെടുവീര്‍പ്പായുയരുമ്പോഴും -

ഈറനണിയാത്ത ഓര്മകളാലേ,

നിന്റെ നറുമണമെന്‍ തൂലികയെ നിറയ്ക്കട്ടെ

ഒരേ അകലത്തില്‍ കാണുന്ന താരങ്ങള്‍ തെളിച്ച‍ വഴിയെ-

എന്‍ വിരലുകള്‍ നിന്നിലെത്താന്‍ കൊതിക്കവേ,

എന്റെയിമകളിലൊതുങ്ങും പ്രണയാര്‍ദ്രമാം‍-‍ നിലാവും 

നിന്റെ സ്വരത്തിനായ് കാതോര്ത്തിടുന്നു ,

വിരഹിയാം സ്വപ്‌നങ്ങള്‍ ഉറക്കം നടിക്കിലും ,

സജലമെന്‍ മിഴികള്‍ നിന്നധരം മറക്കാത്തൊരു-

ചുമ്പനം തുളുമ്പവേ , തേനൂറും തെന്നലാലെന്‍ -

പുഞ്ചിരി പകുത്തു ‍ പാതിരാമുല്ലകള്‍ പൂത്തുലയുന്നു. ! 
 

  • Digg
  • Del.icio.us
  • StumbleUpon
  • Reddit
  • RSS
Related Posts Plugin for WordPress, Blogger...